Акафист преподобному Нифонту, епископу Констанции, града Кипрского

Акафист преподобному Нифонту

епископу Констанции, града Кипрского

 

Кондак 1.

Избранный Христом Сыном Божиим на прославление неизреченнаго Его милосердия к кающимся грешникам, сподобившийся ходатайства и заступления Пресвятыя Девы Богородицы, приими от нас недостойных восхваление: Радуйся, отче Нифонте достоблаженный.

 

Икос 1.

Ангел хранитель, приставленный от Бога на хранение души, возрадовася о твоем обращении от темных страстей на путь добродетельнаго жития, и с ним вси святии ангели по неложному словеси Христову: яко велия радость бывает на небеси о единем грешнице кающемся. Сего ради и мы грешнии, радующеся о несказанном благоутробии Божием, похвальная восписуем ти , отче наш Нифонте, сице: Радуйся, неизреченное милосердие Божие к кающимся грешником познавший; радуйся, и нам грешным образ покаяния собою подавший. Радуйся, споручницу спасения, Матерь Божию стяжавший; радуйся, по апостолу: позор ангелов и человеков бывший. Радуйся, из глубины рова страстей изшедший; радуйся, ко спасительному покаянию прибегший. Радуйся, тину от злых очес стрясший; радуйся, ко свету благодати Божией просиявший. Радуйся, зловония смрадных дел греховных избегший; радуйся, обоняния Христова благодеяния вкусивший. Радуйся, радость ангелом сотворивший; радуйся, сатану до конца посрамивший. Радуйся, отче Нифонте достоблаженный.

 

Кондак 2.

Видяще, преподобне отче Нифонте, величие милосердия Божия кающимся грешником, на тебе совершившимся, и мы грешнии и недостойнии дерзаем взывати к Спасителю Богу: Аллилуия.

Икос 2.

Разум лжеименный во еже в мирских сластех влатися отвергл еси, отче Нифонте, разум же благий во еже последовати доброму совету мирскаго друга твоего Никодима восприял еси, егда он на тя со ужасом взирая, сказа тебе: яко лице твое яко мурин черно, от внутренних страстей являшеся; ты же, в сем усрамився, в познание самого себе прииде. Того ради взываем к тебе таковая: Радуйся, добраго друга в Никодиме обретший; радуйся, увещания его смиренно приявший. Радуйся, обличение тебе в лице незлобиво и кротко послушавый; радуйся, обличения сего усрамивыйся. Радуйся, оставити погибельное во страстех житие помысливший; радуйся, всепагубную лесть мира сего уразумевый. Радуйся, всю развращенную жизнь пред умными очесы твоими представивый; радуйся, начало премудрости страх Господень в сердце твоем приемый. Радуйся, вся красная мира сего яко уметы вменивый; радуйся, начало обращения к Богу положивый. Радуйся, вся страсти мирския омерзивший; радуйся, к покаянию усердно прибегший. Радуйся, отче Нифонте достоблаженный.

Кондак 3.

Сила Вышняго осени тя, отче Нифонте, лучею благодати озарив сердце твое, во еже прибегнути к молитве. Ты же, противоборствуя злым помыслом , глаголаше в себе: егда живя блудно, никое же зло срете мя, ныне же, егда хощу к Богу обратитися, кое зло пострадати имам; тем же таковому твоему любомудрию удивляющеся, из глубины души взываем Богу: Аллилуия.

Икос 3.

Имуще богоприятную мысль обратитися к Богу, вшел еси во внутреннюю храмину свою и к стенанию и к плачу обратился еси. Того ради сице к тебе вопити дерзаем: Радуйся, во внутренней храмине телом затворивыйся; радуйся, внутреннюю глубину сердца твоего к покаянию отверзый. Радуйся, восхождение в сердце твоем к Богу полагавший; радуйся, с мытарем перси биявший. Радуйся, множество содеянных лютых помышлявший; радуйся, яко нестерпим гнев Божий еже на грешники нераскаянные размышлявший. Радуйся, яко страшно бысть еже впасти в руце Бога живаго вразумивший; радуйся, ответ на страшном суде Христове тогда во уме приявший. Радуйся, слезные токи от очей излиявший; радуйся, Давидски постелю слезами своими омочивый. Радуйся, стенания из глубины души испущавший; радуйся, воздыхании сердечными Бога на милость к себе преклонивый. Радуйся, отче Нифонте достоблаженный.

Кондак 4.

Буря злобная нападений бесовских объят тя, отче Нифонте, ты же, яко адамант твердый, в терпении твоем пребывал еси, крепко вопия Создателю Богу: Аллилуия.

Икос 4.

Слышаще внутренний помысл, к церкви тя зовущий, ты, отче Нифонте, потекл еси, и ко иконе Пречистыя Девы Богородицы усердно взирая, слезныя токи изливал еси. Тем же и мы слышаще сия, со умилением взываем ти таковая: Радуйся, к Матери Божией прибегший. Радуйся, Ходатаицу о спасении грешных Ю познавший. Радуйся, надежду ненадежным Ю уразумевший; радуйся, покров Божией Матери стяжавший. Радуйся, смирением своим на милость Ея приклонивший; радуйся, помощницу Ю и заступницу у Сына и Бога своего о тебе обретший. Радуйся, помилуй мя, Заступнице христианом, возопивший; радуйся, пред иконою Ея из глубины души возстенавший. Радуйся, видев икону Ея аки склабящуюся, духовныя радости исполнившийся; радуйся, отсюду благодушество восприемший. Радуйся, оттоле всегда имя Ея пресвятое во устах и в сердце обносивый; радуйся, выну во обстояниях помощницу Ю себе стяжавый. Радуйся, отче Нифонте достоблаженный.

Кондак 5.

Боготечной звезде уподобился еси, отче Нифонте богомудре, яко же бо звезда тече к Вифлеему, наставляя волхвов на поклонение рождшемуся Христу, тако и ты притекал еси к Споручнице спасения твоего Владычице, вопия к Богу: Аллилуия.

Икос 5.

Видеша отроцы Халдейстии на руку Девичу Создавшаго рукама человеки, видел еси и ты, отче Нифонте, в болезни сый, посещение тя, багряницею одеянныя Владычицы мира с святою Анастасиею узорешительницею, исцелити тя пришедшею. Сего ради ублажаем тя сице поюще: Радуйся, болезнею от Бога посещенный; радуйся, благодушно оную терпевый. Радуйся, в болезни ничто же иное, токмо: Слава Тебе, Боже, глаголавый; радуйся, и сие Слава помощнице моей Пречистей Деве Марии, вещавый. Радуйся, помазание елеем от кандила приемший; радуйся, знамение милосердия Божия тем познавший. Радуйся, сим духовным врачевством исцеленный; радуйся, чудесно от одра болезненного возставший. Радуйся, попечение о тебе Пречистыя Богоматере познавший; радуйся, с благодарением в церковь Божию притекший. Радуйся, в день Преполовения Пасхи Святых Таин приобщения сподобльшийся; радуйся, от того времени иноческое житие восприемший. Радуйся, отче Нифонте достоблаженный.

Кондак 6.

Проповедник милосердия Божия и Пречистыя Девы Богородицы Матерняго благоутробия к кающимся искренно грешником ты явился еси, преподобне отче наш Нифонте, тако и мы многогрешнии последуем великому примеру твоего покаяния, взывая к Богу: Аллилуия.

Икос 6.

Возсиявый в Египте просвещение истины и отгнавый лжи тьму Христос Господь благоволи возсияти и в душе твоей, Нифонте блаженне, своею благодатию и отгнати темный облак лукаваго, нашедший на тя, тебе же из раба плоти и греха сотворити Себе угодника. Сего ради радующеся духом, взываем ти сице: Радуйся, помощи Божия сподобльшийся;радуйся, осияние благодати Святаго Духа приявший. Радуйся, ярем Христов на ся вземший; радуйся, иго благое Христово понесший. Радуйся, бремя легкое Иисусово восприемший; радуйся, в броня правды Христовой облекшийся. Радуйся, на камени делания заповедей Божиих себе утвердивший; радуйся, щитом веры себе оградивший. Радуйся, в нем вся стрелы лукаваго разженныя угасивший; радуйся, шлем спасения восприявший. Радуйся, духа хульнаго глаголющаго: несть Бога, посрамивший; радуйся, яко добр воин Христов, над вражескими возстании и страховании победу о Христе одержавший. Радуйся,отче Нифонте достоблаженный.

Кондак 7.

Хотящу Спасителю всего мира подати нам грешным образ милосердия своего к кающимся, да познаем, яко несть грех побеждающ человеколюбие Его, ибо удиви в тебе, преподобне Нифонте, вся хотения Своя, ты же воспевал еси немолчно Богу: Аллилуия.

Икос 7.

Ныне подвиги умерщвления плоти и самоотвержения показал еси, отче Нифонте, за прежде содеянныя грехи, творя плоды достойны покаяния. Тем же согласно вопием ти таковая: Радуйся, аще и не в обители быв, но жестокое иноческое житие приявый; радуйся, храмину твою келлиею монашескою сотворивый. Радуйся, зельным пощением плоть свою умерщвлявый; радуйся, воду пред очесы токмо поставляя, жажду терпевый. Радуйся, не о брашне, но о всяком глаголе исходящем изо уст Божиих помышлявый; радуйся, ранами Христа ради тело твое удручавый. Радуйся, не глаголания ради праздных словес камень себе во уста влагавый; радуйся, всенощному бдению прилежавый. Радуйся, сну яко рабу повелевавый; радуйся, самовольный мученик явивыйся. Радуйся, плоть твою духови покоривый; радуйся, над страстями воцаривыйся. Радуйся, отче Нифонте достоблаженный.

Кондак 8.

Странно и чудно промышление о нас Творца и Владыки Бога, яко тебе, преподобне отче Нифонте, из сосуда нечестия содела благодатию Своею сосуд Духу Святому; ты же в радости духовней воспевал еси Ему: Аллилуия.

Икос 8.

Весь бе в нижних и вышних Христос Господь Бог наш седяй бо одесную Отца благоволи явитися тебе, прехвальный отче Нифонте, в видении, объемля тя яко чадолюбивый отец блуднаго сына. Тем же таковому великому чудеси удивляющися, со страхом и любовию вопием ти сице: Радуйся, терпением твоим всю силу вражию посрамивый; радуйся, покаянием твоим Бога на милость преклонивый. Радуйся, смирением твоим на высоту добродетельнаго жития восшедший; радуйся, Отца небеснаго благоутробие познавший. Радуйся, объятий чадолюбиваго Отца сподобльшийся; радуйся, подобно блудному сыну, любезно им приятый. Радуйся, глас Его отеческий слышавший; радуйся, ожидание Его твоего к Нему обращения оправдавший. Радуйся, тем божественным видением услажденный; радуйся, сим о прощении прежних грехов твоих извещенный. Радуйся, по видении том слезы многи от радости духовныя излиявший; радуйся, тайну сию на прославление милосердия Божия ученику твоему поведавший. Радуйся, отче Нифонте достоблаженный.

Кондак 9.

Всякое естество не токмо человеческое, но и ангельское удивися, яко за премногая твоя, преподобне отче Нифонте, борения с лукавыми бесы, дадеся тебе от Бога власть над ними; раз бо они яко до тысящи нападоша на тя, ты же невидимою силою Божиею дал еси им по тысящи ран каждому, Ему же обещахуся с клятвою, яко идеже имя Нифонтово помянется, ни же приблизитися к месту тому; ты же в смирении взывал еси ко всемогущему Богу: Аллилуия.

Икос 9.

Ветии многовещанные риторскими своими языки не возмогут достодолжно восхвалити твоя подвиги и чудеса, прехвальне отче Нифонте, мы же, любовию к тебе побеждаеми, во смирении нашем ублажаем тя сице: Радуйся, по безчисленных твоих подвигах и трудех чудотворения дар от Бога приемый; радуйся, чудотворец и врач недугов человеческих явивыйся. Радуйся, жены некия зельную зубную болезнь помазанием святым елеем исцеливый; радуйся, брата некоего хульными помыслы обуреваема советом твоим ободривый.радуйся, многая и преславная чудеса благодатию Божиею сотворивый; радуйся, чудес творение не своему благочестию и силе, но единому Богу приписуяй. Радуйся, прозорливства дара сподобльшийся; радуйся, о прехождении по смерти душ человеческих откровение приемший. Радуйся, достойных преставления на небо, зрящи духом веселивыйся; радуйся, недостойных отвержение во ад с болезнию души оплакавый. Радуйся, истязание душ на воздушных мытарствах зревый; радуйся, милосердием Божиим искупляемых и оправдаемых зревый. Радуйся, отче Нифонте достоблаженный.

Кондак 10.

Спасти хотя душу твою, о теле твоем всячески небрегл еси, отче досточудный Нифонте, но в богомыслие ум твой присно вперяя, сподобился еси ангельскаго видения и излияния мира на честную главу твою, тем же благоухания небеснаго исполнився, взывал еси к Богу: Аллилуия.

Икос 10.

Стена еси девам Богородице Дево и всем с верою к Ней притекающим, юже и ты, преподобне отче Нифонте, стяжал еси стену и ограждение от всех навет вражиих. Тем же сподобяся милосердию Царицы Небесной, и ты явися нам грешным стена и ограждение от злокозненных душетленных врагов, сего ради возглашаем тебе сицевая: Радуйся, милосердие Царицы Небесной на себе познавший; радуйся, благоутробию Ея подражати тщавшийся. Радуйся, болящия уврачевавый; радуйся, немощныя укрепивый. Радуйся, обуреваемых страстьми молитвами твоими в тишину душевную устроивый; радуйся, бесы от человек отгнавый. Радуйся, грешников на путь спасения наставляяй радуйся, собою им неложный пример подавый. Радуйся, многосплетенныя сети вражия ясно зревый; радуйся, вся оная молитвою твоею яко паучину растерзавый. Радуйся, и о нас грешных к Богу молитвенниче; радуйся, и нам воспевающим память твою помощниче. Радуйся, отче Нифонте достоблаженный.

Кондак 11.

Пение всякое побеждается величием подвигов и чудес твоих, всехвальный отче наш Нифонте, но и сего да не премолчим, яко в видении зрел еси апостола Павла, повелевающа тебе пасти царския овцы, еже прознаменоваше твое на Архиерейский престол возведение; того ради прославляемому тобою Богу, вопием немолчно: Аллилуия.

Икос 11.

Светозарную свещу, поставленную на свещнице церкви Христовой зрим тебе, отче святителю Нифонте, не можаше бо светильник быти сокровен под спудом. Сего ради похвальная восписуем ти сице поюще: Радуйся, бегая славы человеческия, смотрением Божиим во Александрию пришедший; радуйся, яко патриарху Александру о тебе бысть откровение Божие. Радуйся, яко зраком лица подобен был еси святому апостолу Павлу; радуйся, яко подобно ему, и ты был еси сосуд избранный. Радуйся, яко святый архидиакон Афанасий виде ангела тебе сопутствующа; радуйся, яко он же узре на главе твоей венец от камене честна. Радуйся, во вся степени церковныя по чину посвященный; радуйся, во епископа Констанции града Кипрскаго хиротонисанный. Радуйся, вся люди паствы твоея о сем возвеселивый; радуйся, с честию на престол твой препровожденный. Радуйся, о врученной тебе Богом пастве зело прилежавый; радуйся, мысленныя волки от нея отгнавый. Радуйся,отче Нифонте достоблаженный.

Кондак 12.

Благодать посвящения архиерейского, аще и не хотяще, но обаче достойне приял еси, святителю Нифонте, и был еси истинный отец пастве твоей, яко же око слепым и нози хромым, горя бо духом яко светильник великий, воспевал еси Богу: Аллилуия.

Икос 12.

Поюще великое и дивное житие твое, святителю отче Нифонте, воспоминаем и блаженную кончину твою, со слезами сердечными воспевающе: Радуйся, во иерарсех достойный; радуйся, во святителех преизящный. Радуйся, пред святою кончиною твоею болезнь телесную благодушно терпевый; радуйся, яко злато в горниле искусивыйся. Радуйся, патриархом святым Афанасием посещенный; радуйся, беседою его услажденный. Радуйся, пришествием ангелов утешенный; радуйся, на преставление твое пришедший лик мучеников видевый. Радуйся, на скончании твоем сонм пророков зревый; радуйся, на последнее целование твое собор всех Святых грядущий видевый. Радуйся, на приятие праведныя души твоея посещения Святых Святейшия Матере Божия сподобльшийся; радуйся, просветивыйся лицем яко солнцем и предавший в руце Господни дух свой. Радуйся, отче Нифонте достоблаженный.

Кондак 13.

О, всехвальный и достоблаженнейший отче наш святителю Нифонте, яко же в житии твоем многая искушения от диавола претерпевый и, благодатию Божиею его до конца низложивый; сице и нам искушаемым подаждь молитвами твоими, милосердием же Божиим, помощь и по кончине нашей от воздушных мытарств избавление, да со всеми покаявшимися грешники и мы сподобимся достигнути Царствия Небесного и с тобою, ходатаем нашим во веки веков воспевати Богу песнь ангельскую: Аллилуия, аллилуия, аллилуия.

(Этот кондак читается трижды, затем икос 1 и кондак 1)

Молитва

О, священная главо, преподобне отче, преблаженне авво Нифонте, не забуди убогих твоих до конца, но поминай нас всегда во святых твоих и благоприятных молитвах к Богу. Помяни стадо твое еже сам упасл еси, и не забуди посещати чад твоих. Моли за ны, отче священный, за дети твоя духовныя, яко имея дерзновение к Небесному Царю, не премолчи за ны ко Господу и не презри нас недостойных у Престола Вседержителева, и не престай моляся о нас ко Христу Богу, ибо дана тебе благодать за ны молитися. Не мним бо тя суща мертва, аще бо телом преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со бесплотными лики, с небесными силами, у Престола Вседержителева предстоящи, достойно веселится. Ведуще убо тя воистину и по смерти жива суща, тебе припадаем и тебе молимся: молися о нас Всесильному Богу о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу, Ему же подобает всякая слава, честь и поклонение, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.

Назад к списку